Abenduaren 15ean, igandea, Ekialdeko Barrutiko (Altza, Mirakruz-Bidebieta, Intxaurrondo) 20 elkarteren deialdiari erantzunez, ehunka pertsona bildu gara Altzan, Donostiako Udalari eskatuz Hiri Antolamenduko Plan Orokorraren aurrerapenaren proposamenak berriz azter ditzala.
Hitzordua 12:30ean zen, Harria parkean. Aldez aurretik, ibilaldi bat egin da Auditz-Akularren, bertako balio ekologikoak eta egoera naturala ezagutu nahi dituzten pertsona guztientzat, inguruko balio ekosistemikoei buruzko azterlana idatzi duen teknikariaren laguntzarekin.
Ekitaldian eskerrak eman zaizkie parte hartu duten guztiei, eta plan orokorraren asmoei aurka egiteko arrazoiak irakurri dira. Plan horren arabera, etxebizitza-parkea % 50 handituko da Altzan, eta 10.000 biztanle gehiago izango ditu.
Kritika orokorra honako hauei zuzendu zaie: Udalak Ekialdeko barrutiko auzoekiko duen arreta ezari eta utzikeriari, espazio libre eta berdeguneen eskasiari, ekipamendu nahikorik ez izateari, mugikortasun-arazoei, lanpostuen basamortutzeari, eta hiriko auzo suburbialak bezalako tratamenduaren beste sintoma batzuei.
Azkenik, 10 minutuko elkarretaratze zaratatsua egin da Auditz-Akularren aldeko pankarta baten atzean, masifikazioaren aurka eta ekialdeko barrutiko auzoak biziberritzeko eskatuz. Deialdia egin duten elkarteen iradokizunen testua banatu da, eta herritarren aldeko sinadurak bildu dira, bai aurrez aurre, bai bide telematikoz. Datozen egunetan iradokizun hauek aurkeztuko ditugu udaletxean.
Ekitaldia amaitzeko, bertaratutakoei dei egin diegu hurrengo deialdietan parte har dezaten, “garaiz gaudelako plan hau gelditzeko”. Plana desorekatua da, jasangaitza, ez inklusiboa eta Altzarako eta Ekialdeko barruti osorako kohesio sozialaren aurkakoa.
Era berean, hiriko gainerako herritarrak animatu nahi ditugu Altzaren iradokizunarekin bat egitera, guztion etorkizuna baitago jokoan.
DONOSTIAKO PLAN OROKORRARI EGINDAKO IRADOKIZUNA, ALTZARAKO ETA EKIALDEKO BARRUTIRAKO DESOREKATUA ETA JASANEZINA DELAKO
– Donostiako Hiri Antolamenduko Plan Orokorrak ez die erantzuten Altzaren beharrei, eta, gainera, hiriarekin alderatuta desoreka handia dagoen egoera larriagotuko du. Donostia osoan 10.000 etxebizitza inguru eraiki nahi dira, ia erdiak Altzan pilatuta egongo lirateke.
– Ekialdeko Barrutian (Altza, Intxaurrondo, Mirakruz-Bidebieta) 5.360 etxebizitza berri eraikitzeko asmoa dute. Altzan 4.105 etxe lirateke, horietatik 3.249 Auditz-Akularreko eta Esnabideko makrourbanizazioan eta beste 856 Altzako hainbat auzotan banatuta, hala nola Jolastokietan (Zardoya-Otis), Oletan, Alfen, Errotetan, Txingurrin eta Herrera. Eta Intxaurrondon 1.255 etxe gehiago. Bidebietan bat ere ez.
– Altzan, etxebizitza berriek lehendik daudenak baino %50 etxebizitza gehiago egitea ekarriko lukete, gaur egun 8.246 etxebizitza baitaude Altzan (2019). Horrek are gehiago larriagotuko du gure auzoen egoera, hiriko dentsitate handienekoak baitira, eta ez dute Harria parkea berdegunea besterik.
– Altzan etxebizitza berri bakoitzeko 2,5 pertsona kalkulatuz gero, 10.262 biztanle berri izango lirateke, hau da, egungo biztanleria % 50 baino gehiago handituko litzateke, (20.258 biztanle 2019an), 30.000 baino biztanle gehiagoko kontzentrazioa eraginez.
– Plan honek ez du inbertitzen gaur egungo eskasia historikoak konpontzeko, ez Altzan ezta Ekialdeko Barrutian. Izan ere, gabezia horiek larriagotu egingo dira etorkizunean, espazio libreen eta berdeguneen eskasiari, osasun-, asistentzia, kultura-, hezkuntza- eta kirol-ekipamenduen eskasiari, aparkalekuei, irisgarritasun- eta mugikortasun-arazo larriei; hirugarren mailako periferiako gune izaten jarraitzea nahi dute! Gure auzoen biziberritzea behar dugu!
– Planak Altzarentzat duen diseinu honek ez dio bere filosofian esaten duenari erantzuten eta are gutxiago asetzen ditu gure auzoen beharrak; ezin da Auditz-Akular okupatu, horixe da gure landagunetik geratzen dena, eraldatugabea, berezia; gure birika berdea!
– Donostiak behar duen etxebizitza babestua da, ez librea, eta hiri osoan tartekatu behar da, gaur egun hutsik dauden eraikinetan eta auzo eta eremu guztietan, ghettoetan kontzentratu gabe.
Altzako Historia Mintegia (AHM), Altza XXI Herri Ekimena; asociaciones vecinales de Altza, Elkartasuna, Buenavista, Gure Bidea, Herripe, Lodabe (Lorete-Darieta-Berra), Oleta, Osteguna; de Bidebieta Bideak; de Intxaurrondo IZBE, Marruelkar e Intxaurdi; asociaciones culturales Altzania y Showtime; Bizarrain euskara elkartea; asociaciones de mujeres y feministas Intxaurrondo Berri, Ostadar, Elkartea Berri, Plazandreok.
