Ez gaude hauteskunde-kanpainan, baina hala dirudi. Etxebizitza bat eskuratzeko zailtasuna demagogia eta aitzakia bihurtu da proiektu jasanezinak planifikatzeko, adreiluaren lobbyaren interesei soilik erantzuten dietenak.
Hauteskunde kanpaina betean bageunde bezala, alderdiak lasterketa zoro batean dabiltza, denbora gutxiagoan etxebizitza merkeagoak eraikitzeko gai nor den erakusteko. Horrela, aurre egin nahi diete etxebizitzaren prezioari eta herritarrek etxebizitza eskuratzeko duten ezintasunari buruzko datu larriei. Baina batzuek iragartzen dutena eta besteak agintzen dutena ez du arazoa konponduko, arazoa oso urrutitik datorrelako, hain zuzen ere, alderdi politiko horiek hirigintza eta etxebizitzaren kudeaketan izan duten arduran egin duten funtzioen utzikeriagatik.
Donostian, nahi duguna da benetako etxebizitza politika bat, eta ez politika egitea etxebizitzaren arazoa etengabeko kanpaina bihurtuz. Hiriari legez izan beharko lukeen alokairuko eta babestutako etxebizitza parkea emateko hirigintza tresna nagusiarekin, hau da, erredakzioan dagoen Plan Orokorrarekin. Zer egingo duzuen jakin nahi dugu.
Donostian 92.000 etxebizitza libre eta 3.800 etxebizitza babestu daude. Egoera honen arrazoiak diagnostikatu, ondorioak aztertu eta merkatua birbideratzeko neurriak proposatu behar dira.
Eta garbi gelditu dadila ezin dela plan orokorraren esku konponbideak utzi, denok baitakigu 10 urte barru arte ez dela aktibo egongo (Aurrerapenean bakarrik 3 urte daramatzagu), eta, ordurako, espazio naturalak zaintzeko beharra hain nabarmena izango da, Auditz-Akular bezalako eragiketak paper bustia izango direla. Denborak ez die proposamen jasanezin, desorekatu eta onartezinei barkatuko.
Hirigintza egitea, hiria egitea, une honetan, ondo kudeatzea da, hobeto kudeatzea, ez eraikitzea edozein baldintzatan. Horrek higiezinen sektoreari bakarrik egiten dio mesede.
Altza XXI Herri Ekimena
2025 otsailak 2